В лѣто 6475 [967]. Иде Святославъ на Дунаи на Болгары. И бившемся обоимъ, одолѣ Святославъ болгаромъ, и взя городовъ 80 по Дунаю, и сѣде княжа ту въ Переяславци, и емля дань на грецехъ.

В лѣто 6477 [969]. И рече Святославъ къ матери своеи и къ бояромъ своимъ: «Не любо ми есть жити въ Киевѣ, нь хощю жити въ Переяславци и в Дунаи, яко то есть среда земли моеи, яко ту вся благая сходятся: от Грекъ паволокы, злато и вино, овощевѣ различнии; а и-Щехъ и из Угровъ сребро и конѣ, а изъ Русѣ же скора и воскъ и мед и челядь». И рече ему Олга: «Видѣши ли мя болну сущу; камо хощеши от мене ити»; бѣ бо уже разболѣлася; и рече ему: «Погреби мя, и иди, ямо же хощеши». И по трех днех умре Олга; и плакася по неи сынъ ея и внуцѣ ея и людие вси плачемъ великымъ зѣло; и несъше, погребоша ю на мѣстѣ. И бѣ заповѣдала Олга не творити трызны надъ собою: бѣ бо имущи прозвутера втаинѣ; и тъи похорони ю, блаженую Олгу. Си бысть предтекущиа крестияньстѣи землѣ, акы деньница пред солнцемъ, акы заря пред свѣтомъ; ибо сияше, акы луна в нощи; тако и сиа бысть в невѣрныхъ человѣцѣхъ свѣтяшеся, аки бисеръ в калѣ; калнѣ бо бѣша грѣхомъ, не омовенѣ крещениемъ святымъ. Си бо омыя купѣлью святою, и съвлечеся грѣховныя одежда ветхаго человѣка Адама, и в новыи Адамъ облечеся, еже есть христос. Мы же речемъ к неи: «радуися, руское познание къ богу, начатокъ примирению быхомъ». Си пръвое вниде въ небесное царство от Руси; сию бо хвалять рустѣи князѣ и сынове, акы началницю, ибо по смерти моляшеся богу за Русь. Праведных бо душа не умирають, якоже рече Соломонъ: «Похвала праведному, возвеселятся людие; бесмертие бо есть и память его, яко от бога познавается и от человѣкъ». Се бо вси человѣци блажать, видяще бо ю лежащу за многа лѣта в тѣлѣ своемъ. Рече пророкъ: «прославлю прославляющих мя». О сяковых бо Давыдъ глаголаше: «Память вечную будет праведникъ, от слуха злаго не убоится; готово сердце его уповати на господа, и утвердится сердце его, и не подвижится». Соломонъ рече: «Праведници в вѣкы живут, от господа мъзда имъ есть и устроение от вышняго; сего ради приимуть царствие красотѣ и вѣнець добротѣ от рукы господня: яко десницею покрыеть я и мышцею защитить я». Защитилъ бо есть господь сию блаженую Олгу от противника супостата диавола.